საზოგადოებრივი ტრანსპორტი = დემოკრატია

გამოქვეყნებულია: 25.Sep.2018

თანამედროვე საზოგადოებისთვის მობილობა დიდი გამოწვევაა. ქვეყნის ეკონომიკური განვითარებისას, ჯანდაცვის თუ განათლების სფერეობისგან განსხვავებით, ძირითადად, იგი უარესდება და არამდგრადი ხდება. მობილობა განვითარებადი ქვეყნების პრობლემას წარმოადგენს არა ტექნოლოგიების ან ფულის განხრით, არამედ სამართლიანობის, თანასწორობის შეზღუდვის მხრივ.

განვითარებად ქვეყნებში უთანასწორობის მოგვარება, ძირითადად, არამდგრადი მოდელით ხდება, ანუ ღარიბებიც ცდილობენ მოიხმარონ მანქანები იმის საპირისპიროდ, რომ მდიდრებმაც მოიხმარონ საზოგადოებრივი ტრანსპორტი ან ველოსიპედები. განვითარებად ქვეყნებში ყოველთვის არებობს კონფლიქტი იმის თაობაზე, თუ რაში უნდა მოხდეს ინვესტიცია. თუ, მაგალითად, ინვესტიციების დიდი ნაწილი კონცენტრირებულია დიდ და მასიურ გზატკეცილებზე, ცოტა რესურსი რჩება, მაგ., ველოსიპედების ბილიკებისთვის. საბოლოოდ ვიღებთ სივრცის უთანასწორო გადანაწილებას მათ შორის, ვისაც ჰყავს მანქანა და ვინც არის ქვეითი.

დემოკრატიული თანასწორობის პრინციპის მიხედვით ავტობუსს, რომელშიც 80 მგზავრი იმყოფება, სივრცეზე 80-ჯერ მეტი უფლება აქვს, ვიდრე ადამიანს, რომელიც მარტო მართავს მანქანას. ჩვენ იმდენად ვართ შეჩვეულნი ამ უთანასწორობას, რომ ხშირად ვერც ვამჩნევთ მას. ავტობუსებისთვის სავალი გზის გამოყოფა, როგორც ეს მოხდა კოლუმბიის დედაქალაქ ბოგოტაში, კარგი მაგალითია იმისა, თუ როგორ შეიძლება განვითარდეს გზები და ქალაქები. დიდი უსამართლობაა სივრცის გადანაწილების მხრივ, ფეხით მოსიარულეთა და ავტომანქანებს შორის. ადამიანები, რომლებიც ფეხით მოძრაობენ, ითვლებიან მესამე კლასის მოქალაქეებად, ხოლო მანქანით მოსიარულეები კი პირველი კლასის პრივილიგირებულ მოქალაქეებად. სატრანსპორტო ინფრასტრუქტურის მოწესრიგებისას ხშირად ყურადღების მიღმა რჩებათ ტროტუარების თემა და მხოლოდ ტრანსპორტის სავალი გზების მოწესრიგებით შემოიფარგლებიან ან ტრანსპორტის გზებს ზრდიან ტროტუარების და ფქვეითთა გზების შემცირების ხარჯზე.

მნიშვნელოვანი იდეოლოგიური და პოლიტიკური საკითხია, თუ როგორ უნდა მოხდეს ქალაქის სივრცის გადანაწილება მოქალაქეებს შორის. საზოგადოებრივ ტრანსპორტს, ველოსიპედებსა და მანქანებს შორის. ეს არა ტექნიკური საკითხი, არამედ უფლებრივი მოთხოვნაა, რადგანაც, თუ ამოვალთ ადამიანის თანასწორობის პრინციპიდან, ადამიანებს უნდა ჰქონდეთ მათი მოთხოვნილებების თანასწორად დაკმაყოფილების შესაძლებლობაც. ველოსიპედის ბილიკების შექმნა სწორედ ერთ-ერთი ასეთი საკითხია.

ველოსიპედის მოწესრიგებული ბილიკები მკაფიო გამოვლინებაა დემოკრატიისა, რომელიც აჩვენებს, რომ ადამიანი, რომელიც ატარებს 30-დოლარიან ველოსიპედს ისევე მნიშვნელოვანია, როგორც ადამიანი, რომელიც 30 000-იან მანქანას ატარებს. დღესდღეობით ისეთ დროში გვიხდება ცხოვრება, როცა ქალაქების ნახევარი, რომლებიც იარსებებენ 2060 წლისთვის, ახლა შენდება ან აშენდება. მრავალ განვითარებად ქვეყნებში 80-90 პროცენტზე მეტი ქალაქებისა, რომლებიც იარსებებს 2060 წელს, აშენდება შემდეგ 4 დეკადაში. ეს მხოლოდ განვითარებად ქვეყნებს არ ეხება, მაგ., ა.შ.შ-ში 70 მილიონ სახლზე მეტი აშენდება მომავალ 40-50 წელში — ეს იმაზე ბევრად მეტია, ვიდრე ახლანდელი სახლების რაოდენობა დიდ ბრიტანეთში, საფრანგეთში და კანადაში ერთად. ამიტომ, ძალიან მნიშვნელოვანია ქალაქების დაგეგმვისას ტრანსპორტის ინფრასტრუქტურის სამართლიანობის პრინციპებზე აგება.

მანქანა 10 000 ბავშვის სიკვდილის მიზეზი ხდება ყოველწლიურად მსოფლიოს მასშტაბით. იმის მიუხედავად, რომ ტრანსპორტის ეს საშუალება მხოლოდ რამდენიმე ასეული წელია რაც არსებობს, მან აბსოლუტურად შეცვალა ქალაქები.

მნიშვნელოვანია, რომ ქალაქებში მეტი პრიორიტეტი ენიჭებოდეს ადამიანებს და არა მანქანებს და ქალაქების დაგეგმვა არ ხდებოდეს მხოლოდ მანქანის მომხმარებელთა ინტერესების გათვალისწინებით — არამედ თანასწორობის და სამართლიანობის პრინციპით.

განვითარებული ქალაქი არაა ის, რომელშიც ღარიბიც მიისწარფვის მანქანის ფლობისკენ, არამედ ის, რომელშიც მდიდარიც საზოგადოებრივ ტრანსპორტს იყენებს.

 

ასევე წაიკითხეთ:

image

გამოხმაურება 4 ივლისის ინციდენტზე

აქციის დასრულების შემდგომ, ამბროლაურში, ერთ-ერთ ქუჩაზე შემთხვევით შეხვდნენ ოთარ სირაძე და ჩვენი წევრები, რა დროსაც ყოფილმა გუბერნატორმა მანქანიდან მათ უშვერი სიტყვებით მიმართა და სიტყვიერი შეურაცხყოფა მიაყენა. ცოტა ხანში, ოთარ სირაძე და მისი ძმა გადმოვიდნენ მანქანიდან და ფიზიკურად გაუსწორდნენ ჩვენს წევრს, ნიკოლოზ ღლონტს, რაც დანარჩენებმა ვიდეო მასალაზე აღბეჭდეს.

image

26 მაისი

ამ უმნიშვნელოვანესი დღის მოლოცვასთან ერთად გვინდა, საქართველოს დღევანდელ პოლიტიკურ და ეკონომიკურ მდგომარეობაზე კიდევ ერთხელ დავფიქრდეთ, განსაკუთრებით კი დამოუკიდებლობის პერსპექტივიდან.

 

image

მწვანეების გამოხმაურება დამანგრეველი ჰესების ახალი კასკადის შესახებ

სანამ ადამიანები კორონავირუსით გამოწვეული საგანგებო მდგომარეობის პირობებში გადარჩენისთვის იბრძოდნენ, გარემოს დაცვისა და სოფლის მეურნეობის სამინისტრომ ონის ჰიდროელექტროსადგურების კასკადის მშენებლობის ნებართვა გასცა. საპროექტო ზონაში ექცევა როგორც ქალაქი ონი, ისევე რამდენიმე ახლომდებარე სოფელი, რაც აუცილებლად გამოიწვევს, როგორც სოციალურ, ასევე, ბუნებრივ პრობლემებს

შემოგვიერთდით