RMG Gold-ის პოლიტიკა

გამოქვეყნებულია: 26.Feb.2018

წლების სვლასთან ერთად არაფერი იცვლება - ფუჭი ქანების სასაფლაოდ გადაქცეული ტოქსიკური ნივთიერებებით სავსე კუდსაცავები, სასიკვდილოდ დაბინძურებული წყალი, ჰაერი და ნიადაგი, სასოფლო-სამეურნეო პროდუქტები, რომლითაც ჩვენ ყველანი ვიკვებებით ამ გარემოშია გაზრდილი და გაზავებული.

RMG-ის მკვლელ იმპერიას კორპორაციის საცეცები როგორც ბოლნისის ადგილობრივ, ისე მთლიანი ქვეყნის პოლიტიკაში მყარად აქვს გადგმული. „აღმასრულებელი მენეჯერები“, მთავრობები და პოლიტიკური სახეები ისე იცვლებიან, რომ არც ერთს აწუხებს გარემოს ბედი, არავინ თვლის, რომ თვალის დახუჭვა და გაჩუმება ამ შემთხვევაში დანაშაულია. ესაა დანაშაული, რომელსაც უამრავი ადამიანის ცხოვრება ეწირება როგორც ფიზიკურად, ისე მორალურად და ფსიქოლოგიურადაც.

დღეს საქართველოს პარლამენტის გარემოს დაცვის კომიტეტის თავმჯდომარე, კახაბერ კუჭავა, ამ კომპანიის ყოფილი გენერალური დირექტორია (!). ამ „ინვესტორ-დამსაქმებელის“ წყალობით 2014 წლიდან კაზრეთის საწარმოში აღარ არსებობს პირველადი პროფკავშირული ორგანიზაციაც კი, რომელიც აქ მომუშავე ადამიანების უფლებებს დაიცავდა - ფიქციური ორგანიზაციაც კი არ არსებობს. ხელისუფლებამ საკუთარი მოქალაქეები კომპანიის კეთილი ნების ანაბრად მიატოვა - კომპანიის, რომელიც გვწამლავს და თავზე გვაბიჯებს.

ეს კომპანია იმდენად კეთილმოსურნეა, რომ 2014 წელს საყდრის-ყაჩაღიანის ისტორიული მემკვიდრეობის უნებართვოდ აფეთქება-განადგურების შემდეგ ბოლნისის დასაწყისში მუზეუმი აგვიშენა. მუზეუმი, რომლის არსებობაც თავისთავად ცუდი არაა, თუმცა სასწორის მეორე მხარეს ძალიან ბევრი რამ დევს, რის გადაყლაპვასაც გვაძალებს და კიდევ კარგა ხანი ამოგვადენს ყელში. ზუსტად იმდენი ხანი, სანამ ბოლომდე ამოიღებს რისი ამოღებაც შეიძლება და დაგვტოვებს შავ ტოქსიკურ ხვრელში.

ესაა საკითხი, რომელზეც არ შეიძლება გაჩუმება. ესაა საკითხი, რომელიც აფერხებს ადამიანების სუფთა, ჯანსაღ, თანასწორუფლებიან გარემოში ცხოვრებას როგორც ბოლნისსა და მარნეულში, ისე მათ შემოგარენში და მთელს ქვეყანაში.

***

შაბათს, 24 დეკემბერს საქართველოს პარლამენტის ეროვნულ ბიბლიოთეკაში „მწვანე პოლიტიკის საზოგადოებრივი პლატფორმის“ კვლევის („ქვემო ქართლის სამთომოპოვებითი სამრეწველო დაბინძურების ანალიზი მწვანე პოლიტიკის პერსპექტივიდან“) პრეზენტაცია გაიმართა. ესაა პირველი მასშტაბური კვლევა კომპანია RMG-ის მიერ გარემოსთვის მიყენებულ ზარალთან დაკავშირებით.

პრეზენტაციას ესწრებოდა RMG Gold-ის გარემოსდაცვითი დეპარტამენტის უფროსი - კონსტანტინე ხაჭაპურიძე. როგორც ირკვევა, ბატონ კონსტანტინეს წარსულში გარემოს დაცვისა და სოფლის მეურნეობის სამინისტროში მაღალი თანამდებობა ეკავა.

პრეზენტაციის დასრულების შემდგომ ცხარე პოლემიკა გაიმართა. RMG-ის წარმომადგენლებმა სრულიად უარყვეს კომპანიის მიერ ნიადაგის, ჰაერის, მდ. კაზრეთულას მარცხენა შენაკადისა და სხვა ახლოს გამდინარე წყლების დაბინძურება. მათ ერთადერთ არგუმენტს წარმოადგენდა ის, რომ თურმე დაბინძურების მაღალი მაჩვენებელი, რომელიც არა მხოლოდ ლაბორატორიულად დასტურდება, არამედ აშკარად ჩანს მდინარე კაზრეთულას მარცხენა შენაკადში, წიაღისეულით მდიდარი ნიადაგების ბუნებრივი ანომალიაა. თუმცა, კვლევის ერთ-ერთი თანაავტორის, ალექსანდრე ღონღაძის შეკითხვა, თუ რატომ აღინიშნება დაბინძურების რადიკალურად განსხვავებული მაჩვენებლები 2014 წლამდე (როცა კომპანიამ ისტორიული ძეგლი ააფეთქა და თავისი სამუშაოები დაიწყო) და მას შემდგომ, RMG Gold-მა ფაქტობრივად უპასუხოდ დატოვა; მათ უბრალოდ უნდობლობა გამოუცხადეს არა მხოლოდ „მწვანე პოლიტიკის საზოგადოებრივი პლატფორმის“ კვლევას, არამედ გარემოს დაცვის ეროვნული სააგენტოს კვლევასაც, რომლითაც სწორედ ბატონი ალექსანდრეს სიტყვები დასტურდება. მათ ასევე სრულიად უგულებელყვეს კვლევის კიდევ ერთი თანაავტორის, გურანდა ავქოფაშვილის შეკითხვა იმის შესახებ, რომ კომპანია ძვირფასი ლითონის მოპოვების დროს აფეთქებებისას ჰაერში პირდაპირ ფანტავს ტოქსიკურ მტვერს და არ იყენებს სპეციალურ მტვრის დამჭერებს.

 

კონსტანტინე ხაჭაპურიძემ განაცხადა, რომ კომპანია RMG Gold თავად აწარმოებს უფრო მასშტაბურ კვლევებს, რომლის შედეგების მიხედვითაც ისინი საერთოდ არ აბინძურებენ გარემოს. თუმცა, რა თქმა უნდა, ისინი ამ კვლევებს არ ასაჯაროებენ, ამის უფლებას კი კომპანიას კანონი აძლევს.

კომპანიის წარმომადგენლებმა „მწვანე პოლიტიკის საზოგადოებრივ პლატფორმას“ კვლევის ახლიდან, ერთობლივად დაწყება და კამათის სამუშაო შეხვედრისას გაგრძელება შესთავაზეს. ამასთან დაკავშირებით არსებობს დიდი ალბათობა იმისა, რომ RMG ამით კიდევ ერთ ფარსს გეგმავს, რადგან ესაა კომპანია, რომელიც აშკარა ფაქტებს უარყოფს და უტყუარი მტკიცებულებების მიუხედავად საკუთარ თავს სრულიად უდანაშაულოდ ასაღებს.

ერთი სიტყვით, RMG Gold-მა კარგად დაგეგმილი სპექტაკლი გაითამაშა. კომპანიის წარმომადგენლებმა სიმართლის გასარკვევად მებრძოლების როლი მოირგეს, რომელთაც უსამართლოდ ადანაშაულებენ. კონსტანტინე ხაჭაპურიძემ ასევე განაცხადა, რომ ის არ ისაუბრებდა და არც აინტერესებს აღნიშნული თემის პოლიტიკური ფონი, რომელსაც „მწვანე პოლიტიკის საზოგადოებრივი პლატფორმის“ კვლევის ნაწილი ეთმობა. მაგრამ, სინამდვილეში, შეუძლებელია პოლიტიკური და ეკონომიკური კონტექსტის უგულებელყოფა, რადგან სწორედ ეს ფაქტორები თამაშობს აქ მთავარ როლს. ესაა ნეოლიბერალიზმი, აქ კომპანიას არ ზღუდავს კანონი, რათა მომწამვლელი ნივთიერებები გარემოში გაავრცელოს; აქ ბიზნესმენის მოგების ხარჯზე უპრობლემოდ გაწირავენ მუშების, მომხმარებლებისა და, უბრალოდ, ახლომახლო მცხოვრები მოსახლეობის სიცოცხლესა თუ ჯანმრთელობას; აქ დაპირისპირება ისევ ორ მხარეს შორისაა - მსხვილი კომპანიის ინტერესსა და მოქალაქეთა უსაფრთხოებას შორის.

 

ფოტო © მწვანე პოლიტიკის საზოგადოებრივი პლატფორმა

თეგები:

ასევე წაიკითხეთ:

image

#ტრამვაითბილისს

გარემოს დაბინძურება, სოციალური უთანასწორობა,  ეკონომიკური ჩაგვრა, ანტი-ადამიანური ურბანული პოლიტიკა, განათლების სისტემის კოლაფსი… დაუსრულებლად შეიძლება დღევანდელი ქართული საზოგადოების მძიმე პრობლემების ჩამოთვლა. ამ ასპექტების უმეტესობა საქართველოს მოსახლეობის აბსოლუტურ უმრავლესობას ეხება და აზარალებს, ხოლო ისეთ მასიურ პრობლემას, როგორიც ჰაერის დაბინძურებაა, ვერც ერთი ჩვენგანი გავექცევით — ტყვიითა და მომწამვლელი ნივთიერებებით გაჟღენთილ ჰაერს ყველანი ვსუნთქავთ.

საქართველოს ახალგაზრდა მწვანეების მიზანი სწორედ ამ მდგომარეობასთან ბრძოლა და მწვანე წესრიგის შექმნაა. მწვანე წესრიგი არა მხოლოდ ეკოლოგიური ასპექტის მოგვარებაა, არამედ იგი მოიაზრებს ნებისმიერი ნიშნით ჩაგვრისა და უთანასწორობის აღმოფხვრას. ესაა ადამიანის კეთილდღეობაზე მორგებული წესრიგი.

image

გამოხმაურება ვიტალი საფაროვის საქმეზე

სრულიად შემაძრწუნებელია ჩვენთვის ვიტალი საფაროვის მკვლელობის ამბავი. ვუთანაგრძნობთ მის ოჯახს, ყველა მის მეგიბარსა და ნაცნობს. ვუცხადებთ მათ გვერდში დგომას და მზად ვართ, რაც ჩვენს ძალებში იქნება, ყველანაირად დავეხმაროთ ვიტალის ნაცნობებს ნეო-ნაცისტური და ულტრა-მემარჯვენე იდეოლოგიის წინააღმდეგ საბრძოლველად.  განსაკუთრებით, ვიტალის დედას — მარინა ალანაკიანს, რომელიც სოციალური მედიის საშუალებით მზაობას გამოთქვამს, წინ აღუდგეს ნეო-ფაშისტურ აგრესიას.

image

საზოგადოებრივი ტრანსპორტი = დემოკრატია

თანამედროვე საზოგადოებისთვის მობილობა დიდი გამოწვევაა.ქვეყნის ეკონომიკურ განვითარებისას, ჯანდაცვის თუ განათლების სფერეობისგან განსხვავებით, ძირითადად, იგი უარესდება და არამდგრადი ხდება.
მობილობა განვითარებადი ქვეყნების პრობლემას წარმოადგენს არა ტექნოლოგიების,ან ფულის განხრით, არამედ, სამართლიანობის, თანასწორობის შეზღუდვით.

შემოგვიერთდით